La construcción apreta a los pequeños

El conseyeru d'Infraestructures, Juan Ramón García Secades anunció l'otru día que tan preparando un catálogu de núcleos rurales que va incluyir un sistema nuevu de calificación del suelu empobináu a facilitar la construcción. L'enfotu ye dá-yos vida a los pueblos onde la calificación de "non urbanizable" ye un pilancu pa que se pongan nellos negocios, sobremanera los rellacionaos col turismu. La otra vuelta d'esti marcu podría traducise en que la presión urbanística que yá sufren dellos conceyos, sobremanera los que tan allegaos a les carreteres de más tráficu, acabaren afogaos ente les nueves construcciones. Nesti sentíu, lo que ta pasando nel baxu Nalón puede ser un casu que valga pa columbrar les consecuencies más negatives d'esta desregulación del suelu.Ello ye que a la oriella del Nalón, nel Pueblu de L'Arena, conceyu de Sotu'l Barcu, ta previsto facer una urbanización d'apartamentos con bloques d'hasta ocho pisos en primera llínia de la mar. Estos bloques acorripiaríen de pasu ún de los cañaverales más importantes del país nel qu'añeren delles especies de páxaros. L'asociación de vecinos "Ríu Nalón" ta llevando una campaña d'oposición a esti proyectu, que s'articula alredor delconveniu que tien l'ayuntamientu con tres empreses de contrates pa facer los bloques, y que recueye grandes concesiones en metros d'edificación a cambeu de que les constructores faigan nel pueblu delles actuaciones menores como una pista de deportes y cedan dellos locales. La carretera qu'habría que facer nueva pa llegar a la urbanización nun pasaría pol pueblu, colo qu'esta crecería al marxe d'él. Contra esti proyectu l'asociación presentó un cartafueyu d'alegaciones qu'agora habrá que ver si valen énte la Comisión d'Urbanismu y Ordenación del Territoriu d'Asturies, que ye la que tien que dar de pasu l'actuación y tien la última pallabra. Representantes de l'Asociación de Vecinos "Ríu Nalón" dixeron a Asturies.com que lo que ta cociéndose namás que ye un primer pasu, porque como yá-yos dixeron a ellos, depués d'estos vendrín más bloques de viviendes qu'acabarín por metese dafechu na parte de más interés mediuambiental del llugar.L'Asociación de Vecinos tien puestu cásique dende qu'entamó la polémica esti web especial sobre l'asuntu, y ta tamién pañando firmes contra lo que-yos abulta una gravísima agresión
y una operación especulativa que nun dexa réditu nengún pal pueblu.