La Conseyería d’Industria recibe 9.975 pidimientos d’espedientes de regulación temporal d’emplegu

Dende'l 11 de marzu –l’estáu d’alarma actual decretóse’l 14– y hasta primer hora de la tarde del llunes la Conseyería d’Industria, Emplegu y Promoción Económica recibió 9.975 pidimientos de d’espedientes de regulación temporal d’emplegu. D'ellos tramitáronse 4.550 qu'afeuten a 16.564 persones, informó'l martes.

El director xeneral d'Emplegu y Formación, Pedro Fernández-Raigoso, comunicó esta mañana los datos a los axentes sociales y económicos mientres la primer xunta de la comisión impulsada pol Gobiernu p'analizar el siguimientu de los ERTE presentaos nel país, cifra que nun inclúi los que tramitaron en Madrid empreses con plantes en tol Estáu, casu d’ArcelorMittal. De los 4.450 aprobaos, 4.407 respuenden a causes de fuercia mayor (el 96,85 por cientu) y impliquen a 15.821 trabayadores, mentes qu'otros 143 se deben a causes económiques, téuniques, productives y organizatives y afeuten a 743 emplegaos.

Pa los primeros, el númberu de díes de suspensión por promediu ye de 30, el mesmu periodu marcáu pal estáu d'alarma. Pal restu, ye de 90 díes.

Hostelería y hotelería, servicios de restauración y catering a instituciones; peluqueríes y otros tratamientos asemeyaos, amás d'empreses de pequeñu comerciu caltiénense a la cabeza como los sectores con más espedientes tramitaos. Tres les primeres selmanes d'estáu d'alarma y de paralización de bona parte de l'actividá económica, Emplegu y Formación detectó un ritmu menor de presentación d’espedientes: el pasáu 31 de marzu'l cómputu global yera de 9.170 espedientes frente a los 9.975 actuales.