La Conseyería d'Educación y Cultura llamenta la muerte de Manuel García-Galano

L'escritor tapiegu, decanu de les lletres eonaviegues, foi exemplu pa les xeneraciones nueves d'escritores en gallego-asturianu

La Conseyería d'Educación y Cultura del Gobiernu d'Asturies llamenta la muerte de Manuel García-Sánchez (A Roda, 1922), conocíu tamién pola so firma Manuel García-Galano, y fináu en Balbona (Siero) a los 94 años d'edá.

La conseyería destaca que l'escritor tapiegu foi precursor de la lliteratura en gallego-asturianu nunos años en qu'el so cultivu apeligraba: dende los sos primeros pasos como coautor d'obres de teatru costumista nos años 50 del sieglu pasáu hasta la so etapa posterior nes décades de los 70 a los 90 como autor de numberosos títulos pa los grupos locales d'aficionaos.

La so obra teatral atópase axuntada nos volumes Mareaxes tapiegos (1993) y Erguendo el telón (2000). La so actividá como escritor tamién s'estendió a la prosa: ganador del primer Premiu Xeira de Narracióis Curtias tamién foi'l primer autor que publicó un llibru de relatos en gallego-asturianu: Parzamiques(1993).

Nomáu Fíu Predilectu del Conceyu de Tapia (2006), yera Académicu d'Honor de l'Academia de la Llingua Asturiana (2006) y recibió una reconocencia per parte del Gobiernu asturianu nel I Encontro d'Escritores d'A Veiga (2008), amás de ganar l'III Premio Timón (2009) pola so trayectoria lliteraria.