La Conseyería de Cultura va visibilizar a les muyeres que trabayen nel deporte cola campaña Muévite pola Igualdá

Los testimonios de les muyeres que trabayen nel mundu deportivu van tener voz propia, dando a conocer la llucha diaria por facese un nome nesti campu. Amás, el material ta difundiénse como recursu didáuticu nos centros escolares y conceyos d’Asturies.

La corredora de carreres de monte Alba de Mendiolagoitia Díaz, la xueza internacional de remu Ángela Alonso o la nadadora, entrenadora y directora técnica de la Federación de Deportes pa Persones con Discapacidá Física del Principáu d’Asturies (Fedema) Beatriz Álvarez Valderrama, son dalgunes de les cares de la campaña. Luisa Álvarez Iglesias, ex-palista y entrenadora de piragüismu; Natasha Llee Suárez, xugadora d’h.oquei sobre patinos; Victoria Ortiz de Guinea Argüelles, campeona del mundu d’agua xelao y Cristina Gallo y Estela Noriega, periodistes deportives, completen l’elencu de muyeres que participen en ‘Muévite pola Igualdá’.

La campaña va difundir los testimonios en primer persona d’estes deportistes, entrenadores, árbitres o periodistes deportives pa mostrar el llabor que se fai a diario pa promover l’actividá física femenina, les principales dificultaes qu’atopen nel camín y tamién los retos pendientes. L’oxetivu de ‘Muévite pola Igualdá’ ye dar a conocer el trabayu d’estes muyeres que dende distintos roles y oficios trabayen pa visibilizar el deporte femenín. Y busca proyectar el papel y les xeres de les muyeres dientro del universu deportivu pa menguar les diferencies tan escomanaes qu’entá existen colos homes al respective de condiciones de trabayu y visibilidá.

La Dirección Xeneral de Deporte punxo a disposición de los conceyos y la rede de centros escolares tolos materiales de la campaña p’ampliar el circuitu de difusión, y tamién pa que puedan utilizalos como recursu dientro de les actividaes y xornaes qu’entamen pa la sensibilización y promoción de la igualdá ente homes y muyeres.

La iniciativa ‘Muévite pola Igualdá’ ta impulsada dende la Dirección Xeneral de Deporte de la Conseyería de Cultura y financiada con fondos del Pactu d’Estáu escontra la Violencia de Xéneru. Pal Gobiernu d’Asturies, “la tresversalidá de les polítiques d’igualdá ye imprescindible, y nel mundu del deporte la resquiebra de xéneru resulta bien evidente y relevante”.