La Conseyería de Mediu Rural y Pesca entama la tramitación de la Denominación d'Orixe pal "Quesu Casín"

La Dirección Xeneral d'Agroalimentación de la Conseyería de Mediu Rural y Pesca del Gobiernu asturianu unvió-y al organismo competente dientro del Ministeriu d'Agricultura Pesca y Alimentación, la documentación preciso pa entamar la tramitación de la Denominación d'Orixe Protexida pal quesu Casín.

La Conseyera de Mediu Rural y Pesca, Servanda García; la Directora Xeneral d'Agroalimentación Tomasa Arce y la propietaria de la Quesería Redes, María Ángeles Álvarez, esplicaron ayeri los trámites polos que va mandase'l procesu p'algamar esta denominación, que va abellugar a los quesos que se produzan dientro de los conceyos de Casu, Sobrescobiu y Piloña.

Les protagonistes de la rueda de prensa sorrayaron que d'esti quesu, d'orixe desconocíu, tiense anuncia histórica dende'l sieglu XIV, lo que lu convierte, posiblemente, nún de los quesos más vieyos de tola península.

Fechu con lleche de vaca puro o mecío con otro d'oveya y cabra, el quesu Casín amásase delles vegaes a lo llargo d'unes cuantes selmanes, coincidiendo l'últimu amasáu col cuartu menguante. Nutritible enforma, trátase d'un de los quesos del mundu con más proteines (cerca del 36%. De color mariello escuro, la pieza, que tien ente un cuartu kilu de pesu y 600 gramos, suel tener forma cilíndrica y nuna de les cares suel llevar estampáu'l cuñu del artesanu ellaborador. La producción asítiase en cerca de 3,5 tonelaes al añu, mientres que'l preciu allégase a los 12 euros el kilu.