La Conseyería de Cultura atendió una demanda d'Andecha Astur sobre patrimoniu

La organización nacionalista Andecha Astur emitió esta mañana un comunicáu de prensa en que da anuncia de que'l Serviciu de Patrimoniu Históricu y Cultural de la Conseyería de Cultura atendió les solicitúes del partíu políticu en rellación al monumentu de les "torres de Donlebún" en Castropol, exemplu d'arquitectura civil del sieglu XVI catalogáu como Bien d'Interés Cultural pero sobre'l que la so titularidá particular llendaba les posibilidaes d'actuación pa recuperalu y caltenelu y que presenta un estáu avanzáu de ruina.


Na rempuesta de Cultura a la carta de la organización política sobre l'estáu del palaciu conséñase que Cultura va entamar trámite pa encamentá-y al Conceyu de Castropol y a la propiedá particular del edificiu que lleven alantre les xestiones precises pa remocicar el palaciu. Como encontu a la so reclamación, la organización política presentó'l precedente de Ribedeva, onde l'alcaldía entamó un espediente de rehabilitación forzosa d'otru monumentu de la edá moderna en manes particulares, la Torre de Noriega.