La conferencia mensual d’Ástura va tratar sobre la iconografía relixosa precristiana nel Reinu d’Asturies

José Ramón García ‘Monchu’ ye’l convidáu de l’asociación Ástura pa participar na conferencia mensual qu’entama xunto col Atenéu Obreru de Xixón. El sacerdote va falar esti martes de ‘La simboloxía precristiana na ilesia del Reinu d’Asturies’.

En concreto, va afondar nel “sustratu celta y naturalista d'Asturies y en xeneral de tol noroeste de la Península”, asina como nel “so reflexu na iconografía relixosa durante’l Reinu d’Asturies”. Amás, va analizar el Reinu d’Asturies “como receptor de tal herencia” y la so influencia na mentalidá oficial y nos oríxenes del descubrimientu de la tumba del apóstol Santiago. Monchu, gran estudiosu de la historia del país, foi capellán del Hospital Xeneral y destaca tamién como pintor.

La charra, prevista pa les 19.30 hores, va tener llugar, como ye vezu, nel llocal del Atenéu Obreru de Xixón, asitiáu na cai Cuadonga númberu 7. Ésta forma parte de l’actividá mensual qu’entama Ástura, coleutivu que tien como fines “la promoción, el fomentu, la dignificación y la defensa de la llingua y de la cultura asturiana en tolos ámbitos culturales, educativos, empresariales, y sociales; incluyendo instituciones y organizaciones públiques y privaes”, xunto col “espardimientu y la dignificación de les señes d’identidá d’Asturies”.