La conferencia d'Ástura avera'l fenómenu de la masonería y la so presencia en Xixón

|
Cartelu conferencia masonería Ástura con Víctor Guerra

Va ponela Víctor Guerra, fundando de la 'Logia Rosario de Acuña' y miembru vitaliciu de la 'Logia de Investigación Los Modernos'.

La conferencia d'Ástura del mes de marzu nel Atenéu Obreru de Xixón va centrase nel fenómenu de la masonería y la so presencia en Xixón. Asina la cita d'esta tarde lleva'l títulu de 'Política y relixón na masonería xixonesa (XIX y XX)'.

Na villa hai anguaño cinco loxes actives, "Jovellanos, Rosario de Acuña, Estrella del Norte (Gran Loxa Femenina), Trabayu (de la Confederación Internacional de Loxes Escoceses) y Luz y Libertad", organizaciones desconocíes pa una parte importante de la población. "La masonería considérase una organización llaica y respeta toles creyencies relixoses o filosófiques, nun tien dogmes nin un cuerpu doctrinal qu'esixa una fe, pero caltién la idea d'un orde cósmicu, con un ciertu Ser Supremu (el Gran Arquiteutu del Universu)", apunten d'Ástura.

"Los sos principios son la llibertá, la igualdá y la fraternidá, fomenta la busca de la verdá, la honestidá, l'ameyoramientu personal y el progresu social combatiendo la inorancia, la gafura y la superstición en pro d'un mundu meyor. Tradicionalmente la so gran aportación foi constituyise nun llaboratoriu d'idees, y nuna escuela de formación social y ciudadana de vocación republicana", añaden dende l'asociación cultura.

P'averar a los asistentes a esti mundu convidaron a Guerra, masón activu que tien espublizaos 14 llibros y ufiertaes numberoses conferencies sobre la masonería, amás de contar con una gran esperiencia y cargos n'estayes d'investigación masónica. La cita va ser a les 19 hores, nel llar social del Atenéu, asitiáu na Escuela de Comerciu, con entrada llibre.

Contador Estadistiques