La Confederación Hidrográfica anicia un espediente sancionador por vertíos en Niembru

La Coordinadora Ecoloxista d’Asturies anunció esti llunes l’ainiciu d’un espediente sancionador de la Confederación Hidrográfica del Cantábricu a Agar de Asturias. La empresa foi denunciada por vertir agua contaminao a una riega qu'acaba nel ríu Calabres.
 
Agar de Asturias ye una empresa con sede en Bricia (Posada de Llanera) dedicada al tratamientu del ocle pa la producción d’agar-agar, una sustancia xelatinosa que s’utiliza como mediu de cultivu pal crecimientu de bacteries y fungos. “Del colector de la factoría sale una cantidá d’agua inxente; ésta failo a una temperatura mui alta y presenta un golor fuerte”, comprobaron dende la Coordinadora nel mes d’ochobre, coleutivu qu’añade que “l’agua viértese a una riega qu’acaba nel ríu Calabres, que desemboca na ría de Niembru”. Ello llevó a la Coordinadora a denunciar esta situación ante la Confederación Hidrográfica del Cantábricu, la Fiscalía, “qu’ainició una investigación”, y la Conseyería de Mediu Ambiente, Ordenación del Territoriu y Infraestructures, “que tovía nun dixo nada”.
 
El grupu ecoloxista sospecha que “la depuradora de la factoría nun funciona de manera correuta”, al non enfriar l’agua que vierte a la riega, y que “el bombéu de les agues al colector d’agues residuales que va a la depuradora de Llanes, onde la propia factoría debería d’unviar depuraes p’acabar el so tratamientu”, tampoco. “Entendemos qu’estos vertíos continuaos suponen un delitu ambiental con consecuencies pa la salú y la flora y fauna de la zona. Hai que recordar que la ría de Niembru ye un llugar d’esparcimientu con una playa mui usada na época estival”, añaden los ecoloxistes.
 
Yá hai tiempu, la Coordinadora denunció a esta mesma empresa por nun tener depuradora y consiguió qu’ésta s’instalara, polo qu’agora cuenta con que les alministraciones actúen y obliguen a Agar de Asturias “a tener la depuradora en marcha y tratando las aguas residuales que xenera”. “Esta situación actual supón nun sólo un delitu continuáu contra’l mediu ambiente, sinón un delitu alministrativo al producise un vertíu ensin autorización dalguna”, denuncia’l coleutivu.