Andecha Astur, la CSI y otres organizaciones movilizáronse nel Día de la Nación Asturiana baxo'l lema ‘¡Otra Asturies ye posible!’.
Delles decenes de persones concentráronse ayeri, 8 de setiembre, frente a la Xunta Xeneral pa demandar una Asturies diferente. Una convocatoria xunitaria y abierta na que se lleó un manifiestu de consensu robláu pola fomación nacionalista, el sindicatu y Mocedá Comunista, Juventud Comunista de España (m-l) y Federación Asturiana Memoria y Repúbica (FAMYR).
Llucía Fernández, d'Andecha Astur, y Irene Orviz, de la Corriente Sindical d'Izquierda (CSI), lleeron el testu, que principiaba esplicando que "tamos equí porque tán convirtiendo Asturies nun país precariu y amás ñéguense a reconocemos el drechu a escoyer el nuesu futuru". Llueu de dar dellos datos, citar problemátiques y denunciar la inaición del Gobiernu d'Adrián Barbón y la Xunta Xeneral, apuntaron que "esta mañana concentrémosmos pa revitalizar l’Asturies roxa, l’Asturies verdi, l’Asturies violeta, l’Asturies multicolor que ye posible y que queremos pal futuru inmediatu. Pa revitalizar esa Asturies y pa comprometemos con ella una vegada más y entá con más puxu".
Toles organizaciones, amás d'anunciar el so compromisu, pidieron "a toa Asturies que dea un pasu alantre, que forme un conceyu fuerte al rodiu d'eses custiones mínimes que son de necesidá evidente pa ufrir a les nueses neñes y neños y a los compatriotes emigraos una Asturies roxa, y verdi, y violeta…, y multicolor". L'actu finó cola interpretación de los presentes, con acompañamientu de gaita, de 'La flor d'agua' y con botes de fumu colos colores del país.
Adxuntu | Tamañu |
---|---|
![]() | 25.5 KB |