La Comisión Europea acreita a Asturies como Sitiu de Referencia n'Avieyamientu Activu

|

El Gobiernu participa en Bruxeles na II Cume Europea sobre Innovación pa un Avieyamientu Activu y Saludable.

El conseyeru de Presidencia y Participación Ciudadana, Guillermo Martínez, y la conseyera de Servicios y Derechos Sociales, Pilar Varela, recueyen güei l'acreitación que distingue a Asturies como Sitiu de Referencia n'Avieyamientu Activu, nuna ceremonia presidida pol comisariu européu de Sociedá y Economía Dixital, Günter Oettinger. Asturies algamó esti títulu en xunetu pol so compromisu col avieyamientu activu, en presentándose con una candidatura integrada pola Alministración nacional y representantes del texíu investigador, empresarial y social del país.

Los sitios de referencia son reconocíos pola EIP-AHA, dependiente de la Comisión Europea, y son territorios, ciudaes y organizaciones que tienen un enfoque integral nesta materia, acreiten el so impautu y comprométense a trabayar en polítiques innovadores. El plan d'actuación del Gobiernu céntrase en trés llinies: la ellaboración d'una Estratexa Asturiana d'Avieyamientu Activu, la realización d'aiciones pilotu innovadores colos recursos asistenciales de l'Alministración y Cruz Bermeya, y la puesta en marcha de procesos de tresferencia de teunoloxía, conocencia y bones práutiques ente los países europeos.

74 distinciones

La capital belga acueye estos díes la II Cume Europea sobre Innovación pa un Avieyamientu Activu y Saludable, entamada pola Direición Xeneral de Redes de Comunicación, Conteníos y Teunoloxía de la Xunión Europea (DG-CNECT). Trátase d'un foru de reflexón y intercambiu d'esperiencies sobre les oportunidaes qu'ufierta la teunoloxía p'ameyorar la vida de les persones mayores.

Nesti marcu, l'Asociación Europea d'Avieyamientu Activu y Saludable (EIP-AHA) va axuntar a tolos territorios que trabayen agrupaos sol sellu 'Sitiu de Referencia' y va dar les 74 distinciones concedíes anguaño, una d'elles a Asturies.

Contador Estadistiques