La Comisión pal futuru del Valle de los Caídos recomienda sacar los restos de Francisco Franco

L’informe de la Comisión d’Espertos pal futuru del Valle de los Caídos propón que los restos de Franco se desentierren y treslladen a un llugar ú decida la familia del dictador. Esta midida nun tien l’apoyu de trés de los doce miembros.
 
Los dos presidentes de la Comisión, Virgilio Zapatero y Pedro José González-Trevijano, presentaron güei xunto al ministru de la Presidencia en funciones, Ramón Jauregui, les conclusiones qu'algamaron tres cinco meses de trabayu, que tán basaes nuna "resignificación" del Valle de los Caídos pa tornalu nun llugar en memoria de "toos" los finaos mientres la Guerra Civil y la represión franquista posterior. Nesti contestu, l'informe sorraya la intención de quitar al recintu cualquier connotación ideolóxica y política y caltién qu'esto namás va ser posible si nél namás permanecen los restos de los muertos mientres la guerra, ante lo qu'encamienta que los restos de Franco se treslladen "al llugar que considere la familia" o a aquel "que se considere dignu y más afayadizu".
 
Pa la Comisión, esti treslláu namás ha de facese con un consensu social grande, de tol arcu parllamentariu. Pero amás, dao que la Ilesia tien competencia plena sobre l'interior de la basílica, que ye onde s'alcuentren los restos del dictador, sería necesaria la so autorización pal desentierru, polo qu'anima al Gobiernu a buscar un alcuerdu coles autoridaes eclesiástiques pertinentes. Tocantes a la familia de Franco, los dos presidentes desvelaron que caltuvieron una reunión cola so fía, Carmen Polo, que calificaron de "cordial".
 
Nella, Polo pidió que los restos del so pá permanezan nel llugar onde s'enterraron nel 1975. Amás, recordó-yos qu’escoyer el Valle de los Caídos pal so enterramientu foi una decisión del Gobiernu daquella, presidíu por Rafael Arias-Salgado, porque'l so padre nunca manifestara'l so deséu de que lu enterraren nel llugar. Tanto Virgilio Zapatero como González-Trevijano coincidieron na necesidá de consultar a la familia cualquier decisión que se tome al respeutu pero, al contrario que lo que pasa cola Ilesia, reconocieron que la so posición nun ye vinculante y el Gobiernu tien potestá pa contradicir el so deséu.
 
La propuesta de treslláu de los restos de Franco nun tuvo l’apoyu de Miguel Herrero de Miñón, Feliciano Barrios y el mesmu González-Trevijano, qu'antes d'esplicar el so votu particular quiso resaltar la "fonda vocación democrática" de los trés y aseguró que la so discrepancia nun pon en nengún momentu en cuestión la calificación del franquismu como réxime dictatorial.
 
Primo de Rivera siguiría na basílica
 
El puntu nel que sí coinciden los doce miembros de la Comisión ye'l relativu a los restos de José Antonio Primo de Rivera, que consideren qu'han permanecer nel recintu por ser víctima de la Guerra Civil pero "nun ocupar un llugar preeminente dientro de la basílica dada la igual dignidá de tolos ellí soterraos". Ente'l restu de los sos encamientos, nos que sí hubo unanimidá, la Comisión destaca la necesidá d'una "resignificación" integral del recintu del Valle de los Caídos y pa ello propón la creación d'un conxuntu artísticu na escampada que s'alcuentra frente a la basílica qu'honre la memoria de tolos que tán ellí soterraos. Esti monumentu incluyiría los nomes de toos ellos y tamién un recuerdu d'aquellos que tán ensin identificar. Pero amás, considera necesaria la rehabilitación del cementeriu, la creación d'un espaciu destináu a la meditación y la construcción d'un centru d'interpretación qu'esplique "cuándo, cómo, por quién y por qué" se construyó'l Valle de los Caídos.
 
L'informe de la Comisión d'Espertos va quedar agora en manes del próximu Gobiernu del PP, al qu'animaron a siguir colos trabayos porque se trata d'un testu "que permite mirar p'alantre y hermanar a los que tuvieron engarraos", según aseguró González-Trevijano.