La Comisión Europea va atacar a los gobiernos qu’acuten zones llibres de tresxénicos

La Comisión Europea emitió güei una resolución na que recuerda que la creación de zones nes que nun se puean semar o vender productos modificaos xenéticamente por parte d'Alministraciones nacionales o autonómiques "ye una midida desproporcionada que torga'l bon funcionamientu del mercáu". L'informe européu afirma qu'estes prohibiciones van contra les lleis comunitaries, que son de tresposición obligatoria pa tolos estaos miembros y asegura que la llexislación comunitario garantiza la convivencia ente agricultura tradicional y cultivos alteriaos xenéticamente.

L'anuncia de la CE ye una alvertencia clara pal Gobiernu asturianu, que ta inxertu dientro de la "Declaración de Florencia" una asociación de rexones de la UE que quieren sacar alantre la so agricultura ensin el concursu nella de los Organismos Modificaos Xenéticamente. 26 rexones comunitaries, ente elles Asturies y Euskadi, úniques del Estáu Español na rede, quieren al traviés d'esta rede facer un apueste pola producción agrícola de calidá y les denominaciones d'orixe, fuera del modelu que representen los cultivos tresxénicos, que ta demostrao que puen contaminar árees de munchos kilómetros alredor del llugar onde se semen.

Ello amás teniendo en cuenta qu'España es l'únicu miembru de la UE que sema un tantu por cientu significativu de tresxénicos, unos cultivos pa los qu'acutó nel 2005 58.000 hectárees de maíz pa piensu, el 12% de la producción total d'España.