La Comisión Europea dio-y el preste definitivu a la Denominación d’Orixe Protexida pa la sidra Asturiana

La navidá vieno con regalu pa la sidra asturiana. El Diariu Oficial de la Unión Europea del pasáu 23 d'avientu espublizaba'l reglamentu pol que se dan por pesllaos tolos trámites alministrativos precisos pa dar de pasu la Denominación d'Orixe Protexida pa la sidra asturiana. El reglamentu, firmáu pola presidenta de la Comisión Mariann Feischer Boel recueye la denominación billingüe en castellanu y asturianu "Sidra de Asturias / Sidra d'Asturies" y inxerta a la sidra asturiana nel catálogu de productos con denominación d'orixe.

Remata d'esta manera'l llargu procesu qu'entamare nel añu 2003, cuando la Conseyería de Mediu Rural y Pesca entamó tolos trámites pa dar d'alta la Denominación. L'ampliación de la Unión Europea provocó que s'estragaren toles estayes alministratives de la UE, polo que'l reconocimientu de la Denominación tardó más de lo que se contaba. La noticia recibióse con gran contentu na Conseyería de Mediu Rural y Pesca dende onde se sorrayó que'l reconocimientu de la D.O. va "aportar tranquilidá al sector y va afogar les incertidumes que provocaren delles vegaes discursos malintencionaos que facíen referencia a una mala tramitación por parte d'esta Conseyería de la D.O.".

La Conseyería diz tamién que tan trabayando na tramitación de Denominaciones d'Orixe Protexíes y Indicaciones Xeográfiques Protexíes nueves, que van beneficiar al Choscu de Tinéu, el Quesu Casín y el de los Beyos y al Miel d'Asturies. Anguaño yá esfruten d'etiqueta de D.O o d'IXP los quesos de Cabrales, Afuega'l Pitu y Gamonéu, la Faba Asturiana, la carne de Xata Asturiana y el Vinu de la Tierra de Cangas.