La Comisión del casu ‘Marea’ recibe un anónimu que denuncia delitos nuevos d’altos cargos d’Areces

|

Un escritu anónimu unviáu a la Comisión qu’estudia’l casu de corrupción n’alministración asturiana denuncia delitos nuevos qu’afeutaríen a altos cargos del Gobiernu de Vicente Álvarez Areces. La mesa treslladólu a la Fiscalía del TSXA.

Estes irregularidaes nueves n'empreses del entornu d'Igrafo  y qu’afeuten a titulares yá implicaos n'otres árees del casu y a la Conseyería de Salú, al Serviciu de Consumu, y polo tanto, a altos cargos del Gobiernu del país últimu presidíu por Vicente Álvarez Areces. Según informaron dende la Comisión Especial non Permanente d'Investigación del Casu 'Marea', l'escritu refierse a fechos constitutivos de delitu, polo que la mesa alcordó tres una xunta estraordinaria na Xunta Xeneral, treslladar "de momento" el documentu a la Fiscalía del Tribunal Superior de Xusticia d'Asturies (TSXA).

D'esta forma pretenden cumplir cola obligación prevista nel artículu 263 de la Llei d'Enxuiciamientu Criminal qu'establez que "los que por razón de los sos cargos y oficios tuvieren noticia de dalgún delitu públicu, van tar obligaos a denuncialu darréu al ministeriu fiscal, al tribunal competente, al xuez d'instrucción, y nel so defectu, al municipal o al funcionariu de policía más próximu al sitiu, si se tratare d'un delitu evidente". El presidente de la Comisión, y diputáu d'UPyD, Ignacio Prendes,  aseguró que la documentación recibida queda en poder de los miembros que componen la mesa y qu'agora va corresponder evaluala nesi marcu, “pero'l primer pasu yera dar cumplimientu cola obligación de treslladalu a la Fiscalía", indicó. Nel escritu axúntense actuaciones que nunca se llevaron a efeutu y apúrrense datos contables precisos.

 

Contador Estadistiques