La Comisión de Siguimientu del Carbón torna a aconceyar esti miércoles na sede del ministeriu

La sede del Ministeriu d’Industria acueye esti miércoles, a partir de les 17 hores, una reunión nueva de la Comisión de Siguimientu del Carbón. El sector mantién el paru indefiníu y los sindicatos nun esperen avances.
 
La de mañana va ser la segunda Comisión convocada dende l’aniciu de les movilizaciones, que güei treslladáronse a El Musel. Dellos centenares de mineros cortaron el tráficu na entrada de les instalaciones portuaries a l’altura de L’Arbeyal. Amás, los trabayadores trancaos nos pozos Candín y Santiago mantienen la so protesta y ochos persones entamaron una acampada, por turnos, frente a la Delegación del Gobiernu estatal n’Uviéu.
 
El paru na minería del carbón nun ye l’únicu indefiníu que vive’l país, yá que los trabayadores del tresporte per carretera tamién mantienen la fuelga. Esta mañana la Guardia Civil tuvo qu’escoltar a 374 camiones, la mayoría procedentes de fuera d’Asturies, pa que nun tuvieren problemes pa llegar a destín. Les asociaciones patronales del tresporte (Car, Astra, Asvipmet, Cesintra y Asetra) criticaron güei de forma conxunta la "violencia, estorsión y sabotaxes de los que foron oxetu los tresportistes, autónomos y conductores qu’optaron pol so derechu al trabayu a lo llargo de la segunda xornada de fuelga indefinía n’Asturies".