La Comisión Constitucional del Senáu aprueba’l testu de la reforma, que va votase en Plenu'l miércoles

|

El Plenu del Senáu va votar el miércoles la reforma del artículu 135 de la Constitución que pretende’l PSOE y el PP pa fixar un techu presupuestariu. Esti martes, la Comisión Constitucional de la cámara dexó llistu’l testu ensin permitir enmiendes.
 
El testu salió alantre cola aprobación del PSOE, PP y del senador Ramón Aleu (PSC), representante d’Entesa na Comisión, mentes que’l de Coalición Canaria votó en contra. Los senadores de CiU y PNV decidieron nun votar. El resultáu de la sesión, poro, foi l’esperáu, cola noticia única de la decisión de socialistes y populares de nun aceptar nenguna de les enmiendes presentaes polos grupos parllamentarios nel Senáu.
 
Mañana va debatise nel Plenu del Senáu sobre la reforma de la Constitución y los grupos van tener la oportunidá de defender les sos propuestes enantes de la votación sobre la modificación del artículu 135. Nesta sesión va tar presente, como ún de los dos representantes de la Xunta Xeneral, Isidro Martínez Oblanca (FAC), primer senador de la historia de la democracia que forma parte d’un partíu asturianu.

Contador Estadistiques