La Comarca de la Sidra presenta les sos campañes de normalización del asturianu

La Mancomunidá Comarca de la Sidra presentó esti martes nún actu que tuvo llugar en Nava cola participación de tolos sos alcaldes, les sos campañes de promoción del asturianu en comerciu y na hostelería. Entamaes pola mancomunidá en collaboración cola Conseyería de Cultura, Comunicación Social y Turismu, estes campañes empobínense al sector hosteleru y al comerciu.

La campaña de promoción dientro del sector de la hostelería naz col oxetivu cimeru de favorecer l'usu del asturianu en tolos establecimientos que lo deseen teniendo en cuenta que ye un de los sectores onde se caltién d'una manera más viva l'usu de la llingua.

La campaña quier afitar el "valir añadíu" que ye la lingua pa los restoranes de la comarca y faise na idea de que, de cara a los turistes y visitantes del conceyu, la llingua preséntase como una seña d'identidá que fai posible estremar una autenticidá especial nos productos gastronómicos, mientres que, de cara a la xente d'Asturies, l'asturianu preséntase como un valor de proximidá y d'apreciu polo propio, y sobre manera supón una meyora na calidá de los servicios al garantizar que los clientes son atendíos na so llingua.

Les autoridaes de la mancomunidá tienen estudios que demuestren la bona acoyida, nivel d'usu y receptividá del idioma en tola comarca, y por eso camienta que l'usu del asturianu na hostelería, espaciu central de rellación ente les persones, ye un ámbitu fundamental na promoción social del nuestru idioma propiu.

Otru tanto asocede col comerciu, y por ello la segunda campaña qu'entama güei va empobinase a esti sector, afitando l'asturianu como llingua vehicular que val pa desenvolvese ensin problemes nes actividaes diaries.


Los materiales pa les dos campañes incluyen elementos publicitarios específicos pa cada ámbitu. Nel casu de la campaña d'hostelería, amás de carteles y lletreros indicadores, apúrrese un un CD-ROM con software pa la xeneración personalizada de cartes de platos y menús personalizaes n'asturianu, mientres que na campaña de comerciu va sacase material nuevo, consistente en seis tipos de cartelos pa carniceríes, pescaderíes y fruteríes con casos prácticos como'l despiece d'un xatu o'l d'un gochu, cartelos de pexes y mariscu y d'estremaos tipos de frutes y de verdures.