La Coalición Unidá asegura que va tar nes elecciones autonómiques cola so sigla

Inaciu Llope, candidatu d'Unidá, coalición que vio les sos llistes integraes por Izquierda Asturiana, Andecha Astur y Los Verdes-Grupu Verde, anulaes pola Xunta Electoral, aseguró que van recurrir la decisión de la Xunta Electoral, que calificó de "rocambolesca, ensin precedentes y cargada d'intencionalidá política" .

Llope faló d'una "situación xurídicamente escepcional, que nun ye casualidá que se de precisamente equí y agora" porque "tá claro qu'Unidá estorba y too ye poco pa impedir que concurra a les elecciones y consiga entrar nes instituciones". Según Llope la decisión de la Xunta Electoral contradiz tola xurisprudencia de casos asemeyaos porque "Hai decenes de sentencies a lo llargo de tola historia electoral democrática que siempre se resolvieron favorablemente, ello ye, primando'l derechu a presentase a la formación non proclamada y dando toles oportunidaes d'igua de les presuntes irregularidaes". Llope asegura que "al Tribunal Constitucional nun va llevá-y nin cinco minutos danos la razón" y camienta que la Xunta Electoral entró "en cuestiones de llegalidá sobre determinada sigla ensin ser el so llabor". Llope anunció un resursu pela vía contenciosa y al amparu constitucional contra la decisión y sorrayó que "Unidá" nun va achantar.