La coalición Europa de los Pueblos entama’l 29 de mayu la campaña n’Asturies

La organización nacionalista Andecha Astur va celebrar esti día 29 de mayu na Pola Siero'l tradicional "Día d'Andecha". El partíu políticu quier que la fecha tenga nesta ocasión una repercusión mayor por suponer l'aniciu de la campaña electoral al parlamentu européu, convocatoria a la qu'Andecha concurre esti añu enxerta dientro de la candidatura "Europa de los Pueblos" xunta Esquerra Republicana de Catalunya, Chunta Aragonesista, Eusko Alkartasuna, el Partíu Socialista Andaluz, Conceju Nacionaliegu Cántabru y Iniciativa Ciudadana por La Rioja.

Tres de roblase la selmana pasada en Donostia (ciudá simbólica por ser en 1930 el llugar au se firmó otru pautu que llevó a la creación de la II República Española) l`alcuerdu de coalición de la candidatura "Europa de los Pueblos" pa presentase a les elecciones europees, la folixa d'Andecha, que suel contar con actuaciones musicales y discursos políticos ente otros conteníos, va ser el primer actu d'una campaña que s'anuncia intensa, según esplicó a Asturies.com el secretariu de la mesma, Xosé Bermeyu. Enantes d'esta cita, el día 24 va facese otru actu públicu pa presentar tamién n'Asturies el programa electoral col que va concurrir a les urnes la coalición, anque yá na firma del alcuerdu la selmana pasada s'adelantaron delles llinies xenerales y idees básiques del mesmu, casu de la creación d'un modelu européu estremáu del d`anguaño y basáu na "diversidá y pluralidá cultural y llingüística" consiguiendo pa les "naciones ensin Estáu una representación afayadiza en tolos niveles de gobiernu".

Ún de los preseos pa llograr esta representación de les naciones ensin estáu diba ser la creación d'una segunda cámara de representación n'Europa na que xunta'l parlamentu funcionare tamién un "Senáu de los Pueblos"en sustitución del actual Conseyu d'Europa. Josep Lluis Carod-Rovira, secretariu xeneral d'ERC, el partíu más fuerte presente na coalición diz nesti sentíu que ye precisa "segunda transición" nel Estáu español que pase "por articular la institucionalización de los nuestros pueblos" n' Europa.