La Coḷḷa Propinde anuncia'l cese de la so actividá musical

Tres 14 años de conciertos La Coḷḷa Propinde diz "hasta llueu" a los sos munchos siguidores de dientro y fuera del país. Los ḷḷenizos nun van espublizar el discu que tienen grabáu.

"Costónos munchu trabayu tomar esta decisión, pero va tiimpu que yá nun somos quien a siguir y ye curioso porque depués de cuasi 14 años desaverando escayos y maleza, esta vez ye la vida la que nos diz hasta equí amigos", anunciaron recién na so páxina web y nes redes sociales. La Coḷḷa Propinde da esti pasu depués de decenes de conciertos dientro y fuera d'Asturies y de trés discos: 'Ḷḷ', 'Güeria' y 'A teyavana'. La banda ḷḷeniza tien grabaes les pieces que diben componer el so cuartu trabayu d'estudiu, pero lo más probable ye qu'ésti nun sía definitivamente espublizáu.