La CNMV investiga la participación de Caxastur na papelera portuguesa

El diariu madrileñu "El Mundo"
diz
esta mañana que la Comisión Nacional del Mercáu de
Valores (CMVM) ta investigando la participación de Caxastur na
compañía papelera portuguesa Portucel. Según
supo El Mundo de fontes de la CNMV, l'organismu quier saber si
Caxastur y los grupos portugués Lunimo y Sonae amagostaron la venta a Caxastur del 1% de
Portucel, papelera estatal en procesu de privatización.



Caxastur, que tien el 7% de la papelera española ENCE dientro de
la so política d'inversiones empresariales en sectores
estratéxicos, tendría mercao'l 3 d'ochobre el 1,5% de Portucel,
empresa qu'enfrenta agora la fase final de la so privatización. Al
parecer, la operación ente Sonae, Lunimo y Caxastur tendría como
oxetivu pesllar la entrada de nuevos socios al conseyu d'alministración de Portucel.
Sonae, Caxastur y Lunimo tienen el 32% de la papelera, anque pa llegar a trancar el conseyu precisen del 33,3% de los títulos de la empresa. Sonae demostraría asina la intención de defender la so posición en Portucel depués del chascu que llevó n'Ence, onde l'estáu español quixo más da-y el control de la empresa al conxuntu formáu por Caixa Galicia Bankinter y Banco Zaragozano contra la propuesta de Sonae.



Pela so parte, el grupu portugués Sonae, anque ye un desconocíu
pal públicu asturianu, ye'l mayor conglomeráu empresarial y el
más diversificáu de la república lusa, con actividá
nes estayes d'immobiliaria, distribución, industria maderera, telecomunicaciones y finances. Ente los intereses asturianos del grupu
que preside Belmiro de Azevedo rescampla la so participación nel centru
comercial "Parque Principado" que xestionen directamente y nel que
tienen el 25% del capital.