"La ciudadanía de Llanes ye víctima de les redes clientelares del anterior equipu de gobiernu"

Valero, de Podemos, va entrugar na Xunta Xeneral "qué actuaciones fixo la conseyería pa instar a l'anulación de la llicencia illegal y paralización de les obres" del Hotel Kaype.

Xunto con Manolo Carrero, responsable d'infraestructures del Conseyu Ciudadanu de Podemos Asturies, Paula Valero visitó la instalación asitiada en Barru y afirmó que va esixir esplicaciones a la conseyera Belén Fernández al respeuto. Tamién afirmó que-y prestaría conocer la opinión del Executivo de Javier Fernández sobre la indemnización de 15,6 millones de euros que solicita la empresa promotora “d'esta construcción illegal y si va tomar dalguna midida”.

Nesi sen, la diputada esplicó que la solución única pa esti problema ye'l valtu del edificu qu'amplía l'hotel y que “los xestores anteriores respondan col so patrimoniu, porque convién recordar que nesti tema les víctimes úniques de las redes clientelares del anterior equipu de gobiernu municipal son los y les ciudadanes de Llanes”. El PSOE gobernó en Llanes mientres trés decades hasta xunu, cuando Enrique Riestra, de Vecinos por Llanes, resultó investíu como alcalde col apoyu de Foro y PP.

Solicitú d'información

Podemos recuerda que la llexislación vixente asigna al Gobiernu del país competencies pa l'autorización d'actuaciones na zona de servidume de proteición de costes y en materia de proteición de la llegalidá y disciplina urbanística. "Col oxetu d'esclariar les actuaciones irregulares que conduxeron a esta situación y verificar el cumplimientu por parte del Gobierno de la so responsabilidá, de manera que se restaure'l tramu de costa urbanizáu de forma illegal y se protexa l'interés públicu de tolos vecinos y vecines de Llanes contra la inxusta reclamación d'indemnización", Valero adelantó que Podemos pidió información sobre en qué fecha comunicó'l Conceyu de Llanes a la conseyería competente en materia de ordenación del territoriu y urbanismu la concesión de la llicencia d'ampliación del Hotel Kaype, "tal y como esixe l'artículu 578 del Decretu 278/2007, de 4 d'avientu, pol que s'aprueba'l Reglamento d'Ordenación del Territoriu y Urbanismu del Principáu d’Asturies".