La charra d'Ástura céntrase nes rellaciones de parentescu de los neandertales d'El Sidrón

La convidada d'esti mes ye Fe Santoveña, doctora n'Historia y antropóloga social y cultural.

'La familia neandertal: Antopoloxía del parentescu nel clan d'El Sidrón' ye'l nome de la charra sobre cultura asturiana qu'entama cada mes Ástura en collaboración col Atenéu Obreru de Xixón. "Va afondar, dende l'análisis xenéticu de los restos de los 13 neandertales d'El Sidrón (Piloña), nes rellaciones de parentescu y les sos implicaciones colos otros grupos sociales d'esta especie Homo" y "va amosar, nesti viaxe de 49.000 años, la importancia de la prohibición del incestu y de les consecuentes aliances sociales pal intercambiu de muyeres col fin de caltener la reproducción", apunten dende l'asociación.

En concreto, Santoveña va esplicar a los presentes "por qué n'El Sidrón apaecen femes de 3 llinaxes distintos (A, B y C), mientres que tolos adultos masculinos pertenecen al mesmu llinaxe (A). ¿Cómo s'establecen les rellaciones sexuales cuando impera'l tabú del incestu? ¿Espurrieron el conceutu de parentescu más allá de la consanguineidá inmediata? ¿Yera aceptáu l'intercambiu de muyeres con fines reproductivos y pa la igua de conflictos y l'ayuda mutua?". Nesi sen, apunten qu'espertos como Juan Luis Arsuaga afimen que los neandertales yeren seres competentes, con pensamientu simbólicu sobre la muerte, la música, la estética y, quiciabes, sobre la familia y el parentescu.

La conferencia va tener llugar a les 19 hores nel llar del Atenéu, asitiáu na segunda planta de la Escuela de Comerciu. L'accesu ye llibre hasta completar aforu.