La celebración de la Nueche d’Ánimes vuelve a salir les cais d'Asturies

El llevantamientu de les restricciones pol ameyoramientu de la pandemia va permitir una mayor visualización de la Nueche d’Ánimes, que se celebra esti domingu, anque entovía ensin eventos multitudinarios. Tamién conocida como Difuntos, ye una xornada de raigón celta mui presente na nuesa tradición anque anguaño contaminada pola so versión estauxunidense: Halloween.

El Samhain o Nueche d’Ánimes, como se conoz n’Asturies, ye l’añu nuevu celta; el pasu del branu al iviernu, cuando la escuridá gana a la lluz. Poro trátase d’una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos.

Son munchos los rituales que se faen esta nueche y ente les tradiciones qu’entovía lleguen a la nuesa fecha ta l’afuracamientu de nabos, anque tamién de calabaces, que se solíen colocar nos cruces de camín nel pasáu. Pa conocer un poco más d’esta fecha recordamos esta crónica de la charra ‘El Día Difuntos na tradición asturiana’, entamada pola Lliga Celta d’Asturies, que punxo Alberto Álvarez Peña.

¿Cómo celebres tu la Nueche d’Ánimes? Nesti reportaxe de ‘A la Gueta los Suaños’ tamién pues garrar delles idees.

Actividaes pa estos díes

Depués de que l’añu pasáu esta tradición quedara arrequexada a les cases al coincidir nel momentu más prietu de la pandemia, l’ameyoramientu de la situación sanitaria y la retirada de les restricciones permite que se vuelva a visibilizar nes cais, anque entovía ensin eventos multitudinarios. D’igual forma, pal llunes, Tolos Santos, xornada de visites a los cementerios, los diferentes conceyos van siguir controlando aforos.

L’Asociación Sociocultural La Serena, que venía celebrando Samhain onde la piscina del barriu xixonés d’El Llano, nun entama la romería, pero sí organizó’l segundu concursu d’escaparates, un ciclu de cine de terror pa pequeños y grandes y dellos talleres actividaes, ente les que rescampla la charra ‘L’home llobu n’Asturies’ d’Alberto Álvarez Peña mañana a les 19.30 hores nel centru municipal. Amás, Arantza Margolles pon güei y mañana una ruta guiada n’asturianu entitulada ‘El Llano mete mieu’ que cuenta crímenes y lleendes que se cometieron na zona’l sieglu pasáu.

En Gozón va celebrase’l domingu’l VI Concursu de Calabaces nel parque Zapardel de Lluanco dende les 18 hores, con inscripciones pa participar nel mesmu esi mesmu día hasta les 20 hores na carpa instalada nel llugar. Va contar tamién con un amagüestu, una esfoyaza, un taller de mayáu tradicional y l’actuación de Cantaruxare.

Mieres venía celebrando años atrás n’El Requexu, hasta la pandemia, ‘Nun ye Halloween, ye Samaín’. Nesta ocasión tampoco nun va entamalu, anque prepara nel Auditoriu Teodoro Cuesta’l conciertu especial ‘Samaín’ de la Banda de Música de Mieres –entrada llibre previa retirada d’entrada–, el domingu a les 13 hores, con melodíes de películes de terror que va presentar l’actor llocal Alberto Rodríguez.

La Nueche d’Ánimes vien festexándose tamién en Corvera. Asina dende’l llunes tán celebrándose actividaes orientaes a la reciella.