La Catedral recupera l’acta de les sos reliquies

El documentu, orixinal llatín del sieglu XIII, recueye'l conetníu del arca de les reliquies que se guarda na Cámara Santa.

El cabildu de la Catedral d'Uviéu recuperó ayeri ún de los escritos históricos más importantes de tol so corpus documental, que llevaba más de cuarenta años en manes particulares. L'escritu en cuestión nun ye otra cosa que l'acta na que se conseñen los conteníos del arca de la Cámara Santa de la catedral, la caxa au se guarden les reliquies que fexeron de la catedral asturiana centru de peregrinación na alta edá media. La redacción del documentu, que desapaeció en tiempu de la Guerra Civil y que la familia García Trelles tenía en propiedá dende los años 60, ye del sieglu XIII, pero lo que s'espeya nelli ye la rellación d'oxetos que s'alcontraron munchos años enantes, nel 1075, al abrir l'arca con motivu de la visita d'Alfonsu VI a Uviéu. Ello ye que'l documentu que yá ta en poder de la Catedral ye polo tanto una copia d'otru anterior, y recueye tamién la donación a la sede episcopal de les tierres del Valle de Llangréu por parte del monarca con motivu de la so visita.