La Catedral d'Uviéu y el prerrománicu del Naranco reciben visites guiaes n'asturianu

La empresa Ser Asturianu entama esti setiembre trés salides dirixíes por Denis Soria.

'La Catedral d'Uviéu na lliteratura asturiana' ye'l nome de la visita na que, a lo llargo d'una hora, les persones inscrites van percorrer los distintos espacios del interior del edificiu, como son la Cámara Santa, el Claustru o’l Deambulatoriu de la mano de cuasi una decena d’autores d’époques diferentes, de magar el Barrocu hasta la década de los 70. Constantino Cabal, Antón de Marirreguera, Ángeles López Cuesta o Xuan María Acebal van ser dellos de los escritores escoyíos pa, dende les sos obres, poder asomase a la historia del templu góticu y de les sos reliquies.

La otra propuesta ye un paséu peles edificaciones prerromániques del Naranco. La primer parada va ser Santa María de Naranco, únicu palaciu qu’entá se caltién d’un monarca asturianu, pa siguir depués hacia Samiguel de Lliño, templu priváu de Ramiro I.

La visita guiada n'asturianu a la catedral va tener llugar el sábadu, con dos posibilidaes: a les 10 y a les 16 hores. El puntu d'alcuentru ye la fonte de la plaza y el preciu de 10 euros, qu'inclúi el costu de la entrada al templu (7 euros), siendo de baldre pa menores de 12 años.

La prevista al Naranco va ser el sábadu 28, con salida finalmente a les 16.15 hores del Centru d'Interpretación del Prerrománicu, nes Escueles Vieyes, y un preciu de 8 euros qu'inclúi la entrada a Santa María del Naranco (3 euros). Pa participar en toles salíes guiaes ye necesario acutar plaza de manera previa al traviés del númberu de teléfonu 626.221.712. o del corréu electrónicu infoserasturianu@gmail.com.

Na semeya, Santa María del Naranco.