La Casona del Bravial repasa en FEMEX los sos seis años de vida

L'edificiu acueye'l Serviciu de Normalización Llingüística de Samartín del Rei Aurelio y el Muséu de la Memoria del conceyu.

La Feria de Muestres y Esposiciones de Samartín del Rei Aurelio (FEMEX) va desendolcase ente güei y el domingu cola presencia de 64 espositores rellacionaos con diferentes sectores empresariales que van ocupar al completu los 3.000 metros cuadraos qu'ufre'l recintu ferial. Ente ellos destaca'l stand municipal, qu'esti añu va contar con un espaciu pa recordar los seis años de vida de la Casona del Bravial.

La instalación asitiada en Blimea acoyó nesti tiempu, dende'l 21 de xineru del 2010, munches actividaes de distintu tipu: 46 eventos nos que se presentaron llibros o se celebraron conferencies; 36 esposiciones de temática distinta; y 26 campañes de normalización llingüística, ente elles la rotulación d’edificios públicos como l’Ayuntamientu, los dos polideportivos o la piscina municipal. Tamién se fixeron dende'l Serviciu de Normalización Llingüística, qu'anteriormente tenía la Casa de la Mocedá de Sotrondio como sede, estremaes actividaes pa celebrar feches señalaes como la Selmana de les Lletres Asturianes, el Día de la Llingua Materna o les Xornaes de Lliteratura Infantil y Xuvenil. Amás tuvieron llugar proyeiciones nes que se pudieron ver entrevistes a vecinos de la zona o un ciclu de cine n’asturianu.

Hai que destacar que l'horariu d'apertura de FEMEX va ser de 18 a 22 hores, güei; de 11 a 22 hores, mañana; y de 10 a 21 hores, el domingu. Tanto'l sábadu como'l domingu, el recintu comercial del parque d'El Florán va zarrar ente les 15 y 17 hores.