La Casona del Bravial acueye una esposición billingüe de dibuxos de l’artista blimeína González Fanjul

‘El suañu del unicorniu’ ye’l nome de la esposición con testos billingües de Marián González Fanjul qu’acueye estos díes la Casona del Bravial de Blimea. La muestra de l’artista llocal va poder visitase’l 26 y 27 d’esti mes n'horariu de 9 a 14 hores.

González Fanjul aprovechó esta mañana pa recibir a amigos, vecinos, integrantes d’asociaciones y xente rellacionada cola cultura nel conceyu y enseña-yos en persona los sos dibuxos, nos que se plantega “la dicotomía del bien y el mal, del nacimientu y de la muerte, tomando como centru la figura mitolóxica del unicorniu, asociada a la llibertá, los suaños y les ilusiones”. Estes obres van acompañaes por testos esplicativos, tanto n’asturianu como en castellanu.

Les persones que quieren visitar esta esposición con ciertos tientes apocalípticos pueden averase a la Casona del Bravial el miércoles y el xueves próximu n’horariu de 9 a 14 hores. La entrada a la muestra ye de baldre.