La Casa Real tramita un informe xurídicu escritu n’asturianu

La Casa Real dio trámite, unviando parte d'ello a la Conseyería d'Educación, una solicitú de consideración d'un informe xurídicu sobre la situación de la llingua asturiana nel sistema educativu. El documentu, escritu dafechu n'asturianu, presentárelu énte la Casa Real l'asociación "Aconceyamientu de Xuristes pol Asturianu" el pasáu 10 de setiembre, y nelli acúsase al Estáu y al Gobiernu asturianu de "incumplir toles obligaciones a les que se comprometieren cola ratificación de la Carta Europea de les Llingües Rexonales o Minoritaries", en materia educativa.



Xuristes pol asturianu encóntase n'almisión de la carta por parte de la Casa Real pa echar pola para Alministración asturiana, cola que'l lletráu y miembru del colectivu Xurde Blanco tien un enfrentamientu particular por negase a almitir los escritos n'asturianu que presentare'l xurista con motivu de tener que pidir un permisu médicu. Xuristes pol Asturianu llamenta que "mientres el Xulgáu de lo Contencioso-Alministrativo anecia en que ye inconstitucional unviar escritu n'asturianu a les Alministraciones Públiques y provoca una cuestión d'inconstitucionalidá por once palabres n'asturianu enxertes nun impresu redactáu en castellanu, rechazáu pol Principáu, la Casa Real tramita y resuelve una solicitú de 24 páxines, escrita en llingua asturiana".

L'asociación presentare un recursu contra'l Xulgáu Alministrativu d'Uviéu defendiendo'l derechu de Blanco a espresase n'asturianu cola alministrasción acordies col artículu 4.2 de la Llei d'Usu del asturianu. En rempuesta a esti recursu, ún xuez uvieín llevó al Tribunal Constitucional un recursu sobre la "posible inconstitucionalidá" d'esti mesmu artículu.

Dende Xuristes pol Asturianu entrúguense "si el conseyeru d'Educación va a dar el mesmu tratu que-yos da a los funcionarios de la so Conseyería que-y manden un escritu n'asturianu, negándose a tramitalu".

Na carta a la Casa Real, escrita con motivu de la visita del Rei d'España a Asturies pa participar na inauguración del cursu académicu, la organización ponía al rei al corriente de la situación llegal del asturianu en comparación coles demás llingües del estáu. Na carta esplicábense, ente otres cuestiones, como "nel inxerimientu dientro del sistema educativu l'asturianu nun recibió del Estáu la proteición que se yos dio al catalán, gallegu, valencianu y vascu" y llamentábase como los políticos asturianos "avecen a enchipase públicamente pela parte que-yos tocó nel diseñu y xestión d'un modelu educativu estremáu del que rixe nes demás comunidaes autónomes billingües y qu'incumple tolos separtaos del artículu 8 de la Carta Europea de les Llingües Rexonales o Minoritaries" Como conclusión de les sos reflexones, dende Xuristes pol Asturianu alvertíen al Rei d'España que "l'aceptación del convide que se-y fizo al Xefe del Estáu pa presidir la inauguración del añu escolar 2007-2008 na Comunidá del Principáu d'Asturies, pudiere interpretase o emplegase como un aval a un modelu eductivu escepcional n'España, contrariu al testu y finalidá de los trataos y recomendaciones internacionales na materia ya impuestu por determinaes personalidaes polítiques estatales y rexonales".