La Casa Real sal en defensa de la térmica d’Avilés

La causa que lleva alantre la Plataforma pola Térmica d'Avilés, que pide que se salve a esti monumentu de l'arqueoloxía industrial asturiana del derribu pa da-y un usu cultural recibió esta selmana una comunicación oficial de la Casa Real na que se-y comunica qu'esta institución mandare carta al Ayuntamientu d'Avilés pa qu'estudie la
pitición d'indultu al edificiu.



Entidaes como la oficina española de la UNESCO o l'asociación de conservación del l'arquitectura del movimientu modernu DOCOMOMO yá se posicionaren a favor de la salvación del edificiu, mientres que'l Defensor del Pueblu almitió a trámite l'escritu que-y unviare nesti sentíu la Plataforma. Dende la plataforma cívica aseguren que se tienen "contactos telefónicos con Madrid" pa llograr la salvación d'esti "iconu del patrimoniu industrial" que data de la década de los años 50 del pasáu sieglu XX.

Anque yá nes pasaes navidaes entamaren les demoliciones peles instalaciones auxiliares de la térmica, casu del parque de carbones, edificiu de calderes, o tuberíes, la Plataforma enfótase en que se caltenga l'edificiu central, onde s'alcuentra la gran sala de turbines que pue vese na semeya.