La Casa los Alberti acueye la esposición ‘Monumentos y edificios representativos d’Asturies’

L’artista llangreanu Chema Rodríguez Álvarez ye’l creador de la muestra ‘Monumentos y edificios representativos d’Asturies’. La ermita d’El Carbayu y la ilesia de Sama son dalgunes de les reproducciones que se van poder ver en Ciañu.

La gran peculiaridá d’estes obres de Rodríguez Álvarez ye la utilización d’arroz, lenteyes y grana pa la ellaboración d’unes reproducciones que tienen detrás munches hores y paciencia. Los visitantes a la muestra van reconocer la mayor parte de los edificios, munchos d’ellos del Valle del Nalón, yá qu’ente la llista de creaciones espuestes atópense la ilesia de La Felguera, de Ciañu o de Sama; la ermita d’El Carbayu; la Torre la Quintana; la Casa Conceyu de Llangréu y de Samartín del Rei Aurelio; la Casa la Buelga; y el MUMI, ente otros.

La inauguración de la esposición va tener llugar esti miércoles y va permanecer abierta al públicu hasta’l 7 de febreru nel Centru de Referencia de la Llingua y la Cultura Asturiana Casa los Alberti.