La Casa les Llingües yá ufre la posibilidá d’estudiar asturianu

|

El cursu próximu va estudiase asturianu en La Casa les Llingües de la Universidá d’Uviéu. La institución ufre un cursu de 90 hores ente’l 3 d’ochobre y el 31 de mayu destináu a persones mayores de 17 años.
 
La reivindicación vieya de que la Llingua Asturiana tuviera un güecu en La Casa les Llingües yá ye una realidá. Les persones interesaes n’estudiar la llingua del país van poder facelo dende’l 3 d’ochobre en Xixón, Uviéu y Avilés por un preciu de 320 euros. Nesti cursu (nivel A1), los alumnos van enfrentase a situaciones de comunicación real col oxetivu de desarrollar la espresión oral n’asturianu, amás de daprender léxicu y trabayar la fonética.
 
L’horario de les clases va ser martes y xueves, de 19.30 a 21 hores, nel casu de Xixón; llunes y miércoles, de 16.30 a 18 hores, n’Uviéu; y llunes y miércoles, de 18 a 19.30 hores, n’Avilés. La matrícula pa inscribise a esti cursu abrióse’l llunes y va zarrase’l 16 de setiembre. El númberu de places por ciudá ye de 20.
 
El Conceyu Universitariu pol Asturianu (CUPA) entidá que venía reclamando la celebración d’esti cursu, asoleyó un comunicáu felicitando a Marta Mateo Martínez-Bartolomé, direutora de La Casa les Llingües, y al rector, Vicente Gotor por entamar les enseñances n’asturianu na institución. “Esta acción supón el cumplimientu d’ún de los puntos importantes de los alcuerdos ente l’equipu rectoral y el CUPA, que sofitó la candidatura de Gotor nel so día”, señalen nun comunicáu.
 
Otra manera, los miembros d’esti coleutivu van aconceyase nos díes próximos col rector pa falar sobre’l borrador del Reglamentu d’Estudios de Doctoráu. El deséu del CUPA ye qu’ésti se modifique pa que puedan presentase tesis doctorales en llingua asturiana. “Son cientos les persones que se sumaron a esta reclamación del Conceyu Universitariu pol Asturianu nos díes últimos, incluyendo a l’Academia de la Llingua Asturiana, partíos políticios, asociaciones… Dende’l CUPA tamos seguros de qu’hai un verdaderu consensu na sociedá asturiana pa que cambie esta situación de marxinalidá pa la llingua asturiana, que vien provocando enfrentamientos ente la Universidá y los sos alumnos nos tribunales”, afirmen.

Contador Estadistiques