La cartelería del Cabu Peñes escaez l'asturianu

Estrenóse recién y tampoco nun respeta la toponimia tradicional, la oficial en Gozón.

Castellanu y inglés. Son les dos úniques llingües que s'empleguen na cartelería informativa del Cabu Peñes presentada va unes selmanes poles autoridaes municipales.

L'asturianu queda pal escaezu, al igual que los nomes de llugar tradicionales del conceyu, vixentes dende'l 2005. Esta situación fixo qu'Iniciativa pol Asturianu rexistrara una quexa forma al ayuntamientu pol incumplimientu de la toponimia oficial del conceyu na nueva cartelería del espaciu del Cabu Peñes presentada va unes selmanes poles autoridaes municipales.

La organización tamién aprovechó "pa reclamar una mayor presencia del idioma na vida municipal" y solicitó "que se tenga en cuenta la toponimia oficial nos lletreros informativos de cara al futuru, reclamando que la cartelería seya correxida acordies cola normativa vixente".