La Carriona acueye’l segundu taller de rap n’asturianu tres l’ésitu del primeru celebráu en La Xungarosa

|
'Rimando n'asturianu' en La Xungarosa

El taller ‘Rimando n’asturianu’ estrenóse con ésitu’l mes pasáu en La Xungarosa, completando toles places y con tolos participantes con ganes de repetir. El segundu va celebrase'l vienres na biblioteca de La Carriona y ta destináu tamién a neñes y neños de 6 a 10 años.

Tori, Delfo Valdés y Dani Stylo, integrantes de K-Nalón, son los monitores d’esta iniciativa conxunta ente l’Asociación Cultural Mecigayuska y la Estaya de la Llingua d’Avilés que tien l’oxetivu d’averar l’asturianu a la reciella al traviés del hip-hop, al empar que deprende a rapiar. En total van celebrase trés talleres, dos destinaos a neñes y neños de 6 a 10 años y una tercera pa más mayorinos, de 10 a 15 años.

Mañana, a les 17.30 hores, va tener llugar en La Carriona’l segundu, con un llargor d’una hora y media. La participación ye de baldre, anque ye necesario acutar plaza na propia biblioteca d’esti barriu avilesín.

El 6 d’abril, mentes, ta previstu’l tercer taller, que va tener como sede la biblioteca de Los Canapés.

Contador Estadistiques