La carbayera Los Maizales, preparada p’acoyer esti domingu la 'Fiesta la Cultura'

Esti domingu va tener llugar na carbayera Los Maizales la ‘Fiesta la Cultura’, heredera del ‘Día de la Cultura’ que se celebró nesi mesmu sitiu del 1972 al 1984. Nuberu, Spanta la Xente o Anabel Santiago van actuar nesta fiesta de prau.

Tres consiguir tolos permisos necesarios del Gobiernu d’Asturies, pese a les reserves del Conceyu de Xixón, qu’entendía que la carbayera de Los Maizales, asitiada en Cefontes (Cabueñes, Xixón), nun yera’l llugar afayadizu pa la celebración al ser un monumentu natural, el prau ta siendo acondicionáu p’acoyer a miles de persones na xornada del domingu pa disfrutar d’una cantidá grande d’actividaes y actuaciones musicales. Dellos coleutivos de la izquierda asturiana entamen esta folixa que pretende recuperar l’espíritu del ‘Día de la Cultura’ que tuvo llugar nesa mesma carbayera del 1972 al 1984, en plenu franquismu, pa lluchar poles llibertaes. Nesta ocasión, los convocantes entienden necesario xunir a tolos sectores de la izquierda del país pa crear conciencia frente a les recortes y la perda de derechos de los y les trabayadores.

La organización ta acabante de dar a conocer el programa pa esta primer edición de la ‘Fiesta la Cultura’. Asina, na Carpa d’alcuentros l’actividá va principiar al meudía cola charra-alderique ‘Sin carbón no hay futuro para las cuencas mineras’, na que van participar Aníbal Vázquez, alcalde de Mieres; Jesús Barbao, alcalde de Morcín; y David Moreno, alcalde d’Ayer, actu presentáu por Luis Pardo, de Radio Parpayuela. Darréu  va celebrase una llectura de testos lliterarios, na que van tomar parte destacaos autores asturianso. Yá de tarde, a les 16.15, va celebrase la entrega del Premiu ‘Canuto para hacer la ‘o’ 2.0’, qu’entrega’l Movimiento Social pola Escuela Pública, a lo que va siguir, a les 16.45 hores, una llectura de poemes d’Antonio Guerrero, ún de los ‘5 de Miami’, a cargu d’Andrés Huerta.

A les 17 hores, Luis Felipe Capellín va falar de ‘Luis Pardo y el quinto regimiento’, y, media hora más tarde, va tener llugar un cuentacuentos pa neños y neñes. Por último, a les 18.30 hores, dellos coleutivos van lleer comunicaos. Otra manera, dende les 11 hores, tamién se van poder visitar les esposiciones siguientes: Semeyes e Imáxenes de la Fundación Nuberu; graffitis de la Fundación Asturias y proyeiciones de l’Asociación de Fotoperiodistes Asturianos. Éstes últimes van tar compuestes poles coleiciones ‘La marcha negra’, de Fernando Rodríguez, fotoperiodista de La Nueva España; ‘En la habitación perdida’, de Luis Sevilla, fotoperiodista d’El Comercio; ‘15M’, de María Arce, fotoperiodista de Diagonal; ‘Behind the foam’, d’Álex Piña, fotoperiodista d’El Comercio; ‘Movilizaciones mineres’, de José Ramón Silveira, fotoperiodista de La Nueva España; ‘Retratos’, d’Isabel Permuy, fotoperiodista d’ABC; ‘Un caldero, 100 francos’, d’Alejandro Zapico, fotoperiodista; el trabayu conxuntu de los fotoperiodistes Manu Bravo y Tania Juan en collaboración cola Asamblea de Cooperación por la Paz; coleiciones de Constantino Suárez y José Vélez; y la muestra ‘Miraes 2012’.

Mentes, no que respeuta a les actividaes pa neños y neñes, van celebrase talleres de títeres (Jorge Domínguez, Factoría Norte), teatru  (Chus Casado, Producciones Quiquilimón) y maquillaxe (Sheila Montes, Producciones Quiquilimón), a les 16 hores, y, una hora más tarde, dellos xuegos a cargu de Chus Casado, de Producciones Quiquilimón.

Actuaciones musicales

Nel terrén musical, a les 11 la mañana va haber güecu pa la tonada, cola participación de Misael (Lito Texuca), José Manuel Collado, El Che de Cabaños y Marisa Valle Roso. Yá pela tarde, a partir de les 16.30 hores, van actuar Artemio/Rodrigo Aperi, El Problema del Barrio, La Colmena, Proyecto Sol, Alfredo González, Rafa Lorenzo, Anabel Santiago, Orquesta Céltica Asturiana, Julio Ramos, Arma X, La Curuxa, Spanta la Xente, La Tarrancha y Nuberu. Tamién van xubir al escenariu d’esta fiesta de prau, qu’espera tener continuidá nos años vinientes, los vascos Salvador Amor y Gabriel Ortega.