La caravana pola oficialidá anduvo esti sábadu per Siero

La caravana informativa del Conceyu Abiertu pola Oficialidá anduvo esti sábadu peles parroquies del Conceyu de Siero dientro de la campaña reivindicativa que ta llevando alantre la plataforma pa facé-y llegar a la sociedá asturiana'l so mensaxe sobre la oficialidá de la llingua asturiana na próxima reforma estatutaria. Más de quince coches llenos de militantes asturianistes iguaron esta caravana que salió del mercáu de ganáu de Siero a les 11 pa pasar per delles parroquies del conceyu y que s'allegó a Sariegu y Llanera, faciendo bien de paraes pa repartir propaganda y debatir con tola xente que tuviere interesao, como espeya la fotografía.

La Caravana pola Oficialidá nel conceyu de Siero celebrare como actu preparatoriu una xornada completa d'actividaes en La Pola esti martes día 28 con repartu de planfletos informativos nel mercáu de La Pola y actuaciones del grupu El Garrapiellu, Milio'l del Nido, la Coral Santa María de Lieres y el grupu de teatru del IES Ríu Ñora.

Les actividaes del Conceyu Abiertu van siguir nos próximos díes cola celebración el 7 d'abril nel Teatru Filarmónica d'Uviéu a les 19:30h d'un actu folixeru y reivindicativu nel que van participar los artistes Anabel Santiago, Felpeyu, Toli Morilla y Xuacu Amieva. Les entraes pa esti actu del tán disponibles nel quioscu del Escorialín y nel Teatru Campoamor hasta la tarde del mesmu día 7, que van tar yá namás nel ventanu del teatru Filarmónica