La candidatura de la cultura sidrera asturiana a patrimoniu inmaterial yá cuenta con 134 embaxadores

El Gobierno acreitó esti xueves a los primeros embaxadores de la candidatura de la cultura sidrera asturiana a patrimoniu inmaterial de la humanidá. En total son 134 les persones y entidaes que van encargase de sumar sofitos a esta iniciativa nos meses próximos.

Ente los llabores de los embaxadores figuren la xestión del llibru de firmes d'apoyu, qu'en pocos díes sumó miles de robles, en puntos distintos de dientro y fuera del país, y na web de la candidatura, que yá tien versión n'asturianu. Tamién s'encargarán de la coordinación con asociaciones o entidaes pa la recoyida de sofitos, de la distribución de distintivos en chigres y comercios, y de la difusión de materiales informativos y promocionales.

Ente los 134 embaxadores atopamos bandes de gaites, como El Gumial; coleutivos como l’Asociación de Sidra Casera de Carreño o l’Asociación Sociocultural del Vallín; entidaes como’l Muséu de la Sidra; llagares como Foncueva, Trabanco, Riestra o Buznego; chigres y restoranes como’l Yumai o El Llar de Viri; y dellos conceyos de tol país, amás de persones particulares como Xurde Margaride o Loli Olavarrieta. La conseyera de Desarrollu Rural y Recursos Naturales, María Jesús Álvarez González, agradeció-yos “la so disposición a trabayar en favor de la cultura sidrera, un ilusionante retu y proyeutu nel que queremos integrar a tolos asturianos y asturianes, independientemente del llugar onde residan”, recordando asina a los centros asturianos, “que foron los primeros en sumase a la iniciativa, convirtiéndose nos primeros embaxadores”.

Según anunció, la rede “va ser muncho más estensa, yá que tolos interesaos en difundir el proyeutu p’algamar sofitos podrán dir incorporándose nes selmanes próximes”. Sobre la propia candidatura, Álvarez González apuntó que’l Gobiernu, col apoyu de científicos y espertos, lleva meses trabayando na ellaboración de la documentación que requiere la UNESCO pa formalizar la candidatura: “Centrámonos en construyir el rellatu d’una tradición que ye seña d’identidá del ser asturianu; esi xestu inconfundible, esi ritual del escanciáu como parte intrínseca d’una socialización que convida a compartir, a celebrar, a ser solidarios y a estrechar llazos d’amistá”.

Na semeya, un momentu del actu celebráu ayeri nel llagar de Trabanco en Sariegu.