La campaña gallega prende fueu a la rede

Pola so avanzada edá, que los sos responsables de campaña intenten tapecer, y poles sos declaraciones y frases pa la galería, el personaxe de Manuel Fraga Iribarne ta convirtiéndose nún de los políticos más daos al retratu deformante, una característica que los activistes polítcos con un poco d'arte pal diseñu y el dibuxu tan aprovechando según avanza la campaña na comunidá vecina pa facer chancia de la persona del que los sos collaboradores llamen "Don Manuel". Dende la web Fragaga, que pon al veteranu candidatu a la reelección como persona ensin capacidá intelectual pal cargu hasta la web Fraga Naufraga, que remembra'l casu de la xestión de la catástrofe del Prestige como'l fallu más grave na última llexislatura, pasando per animaciones monstruoses sobre la figura de Fraga, la rede ta estrada de visiones caricaturesques sobre'l presidente.

Cola mesma goña, pero entovía con más carga política contra Fraga, el colectivu "Burla Negra" fexo'l documental "Hai que Botalos" un video colectivu con oxectivos políticos claros que pasen por afalar el voto nos sectores de la izquierda, sobremanera la nacionalista, y forzar el cambéu de gobiernu en Galicia. Dellos personaxes de la vida pública gallega apaecen nesti documental fechu d'episodios que traten desde'l problema ente Fraga y Baltar hasta'l problema de la enerxía electrica en Galicia, pasando per una parodia de la serie de debuxos animaos South Park o l'inevitable Prestige. Esti documental va poder vese güei xueves 16 en Xixón nos locales del colectivu Sestaferia (C/Numa Guilhou - Xixón) a les 19:30h.