La campaña de respuesta a Casado llegó a más de 5 millones d’usuarios, convirtiéndose na primer tendencia del Estáu

#YoFaloAsturianu y #FálaseAsturianu, etiquetes que nacieron en respuesta a les pallabres del popular Pablo Casado sobre l’asturianu, llegaron a 2 y 3 millones d’usuarios, de manera respeutiva. La segunda foi per momentos la primer tendencia estatal na rede social Twitter a lo llargo del miércoles.

Iniciativa pol Asturianu, impulsora de la campaña na rede social, manexa un informe fechu por una páxina especializada qu’afita que #YoFaloAsturianu tuvo un algame potencial de 1.853.000 usuarios, con un impautu –cuántes vegaes foi vistu– de 2.850.000. Pela so parte, #FálaseAsturianu, que nació de manera espontánea ayeri en Twitter, llegó a 3.080.000 tuiteros, lléendose en 4.800.000 ocasiones. Estes cifres podríes ser inclusive superiores, según otres fontes.

Tal foi la repercusión que #FálaseAsturianu tuvo mientres gran parte del día ente les diez tendencies a nivel estatal, liderando la llista en momentos puntuales. “Foi la respuesta a la indignación d’unes declaraciones llamentables a les que se sumó güei David González Medina comparando la oficialidá con una toxicidá”, esplica Inaciu Galán, presidente d’Iniciativa pol Asturianu, faciendo referencia a les pallabres del voceru d’Educación del PP d’Asturies nes qu’acusó a la izquierda d’introducir n’Asturies “un venenu qu’enxamás probara”.

Galán entiende que “l’agraviu que sintió la xente d’una persona que diz en Galicia que-y gustaría falar en gallegu y que llueu diz que l’asturianu nun esiste” motivó esta respuesta ente persones de perfiles mui distintos. “Hebo munchos tuits en castellanu d’usuarios que nun falaben asturianu pero que nun discuten la realidá llingüística d’Asturies”, destaca.

Ente ellos taba Pablo Iglesias, secretariu xeneral de Podemos, ún de los primeros n’emplegar la etiqueta #Fálaseasturianu: "Pablo Casado no quiere verlo, pero en Asturias #fálaseasturianu. Defender la riqueza cultural de nuestro país pasa por defender y proteger todas sus lenguas".

Silenciu del Gobiernu y pallabres de Barbón

Guillermo Martínez Suárez, conseyeru de Presidencia y Participación Ciudada, nun quixo ayeri responder a Casado a entrugues de periodistes, pero dexó bien nidio la postura del Executivu socialista contraria a la oficialidá, que precisamente’l so partíu va incluyir nel programa eleutoral pa la llexislatura próxima. “La postura coherente debería ser una reaición por parte del Gobiernu, yá que tien que fomentar y defender la llingua asturiana, como marca l’Estatutu y la Llei d’Usu, independientemete de que tean a favor o en contra de la oficialidá”, asegura Galán.

Pela so parte, Adrián Barbón, secretariu xeneral de la Federación Socialista Asturiana (FSA), comentó en Facebook una noticia al respeuto de les declaraciones de Casado hacia’l so partíu, l’asturianu y otres llingües, nel que respuende “pero si hace una semanas Cherines decía que ellos hablaban asturiano de siempre, ¿no? ¿O acaso no lo hablan y ellos pensaban que sí? Entre esto y la amenaza de que el PSOE va introducir el euskera en La Rioja, no sé dónde vamos”, finando con un emoticonu de sonrisa.