La campaña de marisquéu anicia cola denuncia a trés persones por furtivismu

Trés persones con domiciliu en Cantabria foron denunciaos por furtivismu tres ser sorprendíos con 66,5 quilos de percebe en Nuviana. Esti actu delictivu coincide cola apertura de la campaña de marisquéu n'Asturies.

La operación conxunta de Guardapesques d’Asturies, la Guardia Civil, el Seprona y axentes d'inspeición y vixilancia pesquera de l'Alministración autonómica fixo posible la denuncia d’estes trés pesones, dalgunes con antecedentes. Los furtivos fixérense col percebe nos pedreros conocíos como La Menor y La Menorina, en Nuviana, pertenecientes al Plan de Xestión d’Ouviñana-Cuideiru.

Amás de la denuncia, los axentes prindaron-yos los traxes de neoprenu y los preseos d'estraición de los crustáceos. Tamién fixeron lo propio col vehículu utilizáu.