La campaña de normalización llingüística ‘La sidra, d’Asturies’ llega a Samartín del Rei Aurelio

Tres ponese en marcha en dellos conceyos, como Ḷḷena, Llangréu o Siero, la campaña de normalización llingüística ‘La sidra, d’Asturies’ llega a Samartín del Rei Aurelio. Esta iniciativa ta orientada de manera principal a la hostelería.
 
‘La sidra, d’Asturies’ ta compuesta por dellos materiales que tienen como oxetivu “recuperar el vocabulariu y les espresiones rellacionaes col mundu la sidra, que nos años últimos tán sufriendo un procesu de castellanización que fai que se pierda la so esencia y el so orixe”, señalen dende la Oficina de Normalización Llingüística de Samartín del Rei Aurelio. Asina, ente los establecimientos hosteleros del conceyu, aprovechando la celebración de les Xornaes Gastronómiques de los Nabos en Sotrondio (del xueves al domingu), va repartise un cartelu, inspiráu na campaña de la Xunta pola Defensa de la Llingua Asturiana ‘La sidra como tien que ser’, con una ilustración d’una espicha nel que les persones emiten espresiones asturianes venceyaes a la cultura sidrera; unes llibretines de 18 páxines nes que s’esplica’l procesu de fabricación d’esta bébora y la so historia; y delles pegatines pa los ‘nunmechisques’ de los chigres.
 
“Dende la Conceyalía de Cultura subráyase’l fechu de que la hostelería ye un ámbitu nel que les campañes de normalización llingüística tienen una gran repercusión porque lleguen a un sector de la población mui ampliu, y más coincidiendo con estes xornaes gastronómiques qu’atraen al conceyu a un gran númberu de persones de toda Asturies”, señalen. Xunto a esta campaña nueva de normalización, tamién va facese entrega, al igual qu’años pasaos, dellos de materiales en llingua asturiana ente los que destaquen unos mantelos diseñaos por Alfonso Zapico o unes tarxetes nes que s’esplica la ellaboración de los tres platos típicos de la zona: los nabos, los pimientos y les cebolles. 
 
Na semeya, Gema Suárez, conceyala de Cultura, y Hugo Cortina, responsable de la Oficina de Normalización Llingüística.