La biblioteca móvil de 'Rompiendo Distancias' de Taramundi recibe un reconocimientu estatal

L'Asociación de Profesionales de Bibliotecas Móviles (ACLEBIM) premia esti programa p'ameyorar la calidá de vida de la xente mayor del conceyu que se creó nel 2000.

El serviciu de biblioteca móvil de la iniciativa 'Rompiendo distancias' de Taramundi, que da tamién serviciu a San Tiso d'Abres, va recibir el 19 d'ochobre en Segovia, nel marcu del lX Congreso Nacional de Biblioteques Móviles, el VII Premio ACLEBIM xunto con José Crespo, bibliotecariu del Bibliobús Escolar de Zamora. "Con esti gallardón, ACLEBIM quier reconocer el valor enorme, exemplar pa toos, de cómo partiendo de lo llocal llégase al cumplimientu de los grandes ideales necesarios pa la dignificación de les persones y de les sos vidas cotidianes, siempre dende una óptica amplia y rica, onde la cultura, el cultivu del espíritu, brilla cola mesma intensidá que'l restu de factores", destaquen dende esti coleutivu sobre'l llabor del programa asturianu, al que felicita "pola so lleición de xusticia social, de sensibilidá hacia los más febles y d'alta y real estima a la población a la que sirven".

Nel 2000 echó a andar dende'l Gobiernu 'Frayando distancies' coles mires de dar más servicios a les árees d’Asturies con población disperso y avieyao, como’l conceyu de Taramundi, onde güei viven 646 persones, o San Tiso d'Abres, con 433 vecinos. Asina, en collaboración colos conceyos, úfrese orientación y apoyo psicosocial a persones cuidadores de dependientes, impúlsase la participación de los mayores nes actividaes comunitaries, ofrezse servicios como podoloxía o peluquería en casa y repártese comida a los usuarios nos sos domicilos, con dietes adaptaes a les sos necesidaes o patoloxíes.

En Taramundi esti serviciu móvil tuvo xestionáu hasta agora por Trinidad Suárez Rico, direutora xeneral de Servicios Sociales y Mayores del Gobiernu d'Adrián Barbón.