La baxada del númberu de paraos mantiénse nel 2,9 por cientu en xunu

El númberu de desemplegaos n’Asturies baxó nel mes de xunu nun 2,93 por cientu, una cifra similar a la de mayu, cuando’l descensu foi del 2,95 por cientu. El país finalizó’l mes con 80.743 persones ensin trabayu.
 
Según los datos rexistraos pol Serviciu Públicu d’Emplegu del Principáu d’Asturies, en xunu hubo 2.438 paraos menos qu’en mayu, cuando la cifra total de paraos n’Asturies baxó en 2.529 persones. Estes cifres similares amuesen un descensu progresivu del númberu de paraos nestos últimos meses: dende febreru, cuando había 88.072 desemplegaos, pasamos a los 80.743 de l’actualidá. Sicasí, en términos añales, el paru medró en 5.699 persones, un 7,59 por cientu más.
 
A nivel estatal, el paru quedó al acabar xunu en 4,12 millones de persones tres baxar en 67.858 paraos, con un descensu porcentual del 1,62 por cientu sobre'l mes de mayu. En concreto, el volume total de paraos algamó en xunu la cifra de 4.121.801 paraos. D'esta manera, rexístrase la tercer cayida del desemplegu dende avientu del 2010, cuando baxó en 10.221 persones. Melilla, con una mengua del 9,82 por cientu, ye’l territorio onde más descendió’l paru nesti mes últimu, anque la tasa interañal señala un aumentu del 10,47 por cientu, cifra namái superada por Euskadi, con un 14,28 por cientu. Mentes, Extremadura tien les peores cifres del mes al rexistrar una xuba del 0,48 por cientu.