La batalla de Cuadonga, según les cróniques de la época

Nun se conoz la fecha exauta na que tuvo llugar la batalla de Cuadonga y poco se sabe de los detalles de la llucha ente astures y musulmanes nel monte Auseva. Namái dalgunes cróniques posteriores dan dalgunos datos.

Los historiadores sitúen la batalla de Cuadonga, niciu del mitu que sirve de referencia para celebrar anguaño’l Día d’Asturies (8 de setiembre, Día de la Santina), nel 722, pero nun hai documentos que confirmen qu’ésta tuviera llugar nun día o nun mes concretu d’esi añu. Nella, Pelayo, un noble cristianu de supuestu orixe visigodu que refugaba’l pagu de tributos a los musulmanes asentaos n’Asturies, enfrentó a les tropes musulmanes unviaes por Anbasa, valí d’Al-Andalud, y dirixíes por Alquama nuna zona montañosa cercana a Cangues d’Onís. Al paecer, yera’l segundu llevantamientu de Pelayo, que convenciera a los astures de la zona pa facer frente a los musulmanes depués de que se viese obligáu a colar de Xixón, onde gobernaba Munuza, dirixente árabe encapricháu na so hermana Ermesinda.

¿Pero qué paso en Cuadonga? La crónica más cercana nel tiempu con respeuto a la batalla ye la musulmana, la d’Al-Maqqari, que se refier a Pelayo como un pollín xabaz. Nella señala que los árabes nun pararon d’atacalu hasta que los sos soldados morrieran de fame, quedando Pelayo en compañía de trenta homes y diez muyeres que s’alimentaben de miel. Sicasí, les condiciones de los musulmanes tampoco yeren bones y déxaronlos vivos diciendo “trenta pollinos xabaces, ¿qué dañu pueden facenos?”.

Bien diferentes son les cróniques cristianes. L’Albeldense, fechada alredor del 880, cifra l’éxercitu d’Alquama en 187.000 homes. Ésta cuenta cómo l’obispu Oppas, collaborador de los árabes, dirixóse a Pelayo, abellugáu na cueva, pa convecelu de que cediese énte los musulmaes, a lo que’l caudillu respondió refiriéndose a la fe cristiana, negándose a dexase someter a los paganos, lo que dio aniciu al ataque de les tropes musulmanes. La intercesión de la virxe, provocando un argayu, llevó a la muerte de munchos d’ellos. Similares son les d’Alfonso III, la rotense y la sebatiense. La primera señala que na batalla morrieren 124.000 musulmanes, a los qu’hai que sumar 63.000 aplastaos poles roques cayíes por mediación divina mentes escapaben. Otra manera, hai que destacar que la segunda apunta que Pelayo nun foi escoyíu como caudillu polos astures, sinón polos godos abellugaos n’Asturies.

Referencies más vagues fai la crónica mozárabe, escrita polos cristianos d’Al-Andalus alredor del 754, mentes que’l Testamentu d’Alfonso II, d’alredor del 812, fala de Pelayo como defensor del pueblu cristianu y astur. El mitu de la Reconquista, tán vivu tovía ente una bona parte población, nun llegaría hasta’l sieglu XIX venceyáu al nacionalismu español.