La Bandina estrena la temporada d'actuaciones nel Trisquel

Llega la seronda y con ella los conciertos en locales qu'abelluguen al públicu y a los músicos del mal tiempu. Un exemplu d'ello ye'l Trisquel, qu'ufierta mañana xueves un conciertu de La Bandina, amás de la presentación d'un llibru.

El local xixonés El Trisquel va acoyer mañana xueves dos actividaes de muncho interés pa los amantes de la cultura asturiana. De mano, a eso de les 21:30, la escritora Susana Rodríguez Sela va presentar el so llibru "Cuantayá que Dios fuxó", testu col que ganó'l premiu "Fernán Coronas"de la Sociedá de Festexos "La Regalina" de Cadavéu en 2004. Darréu de la presentación va sonar La Bandina, colos cantares de "de romandela", qu'esta vegada van dir acompañaos de la voz de la cantante de tonada Anabel Santiago que grabó delles pieces nel discu.