La bandera multicultural del FIDO yá preside’l parque de Tapia

El XV Festival Intercélticu d’Occidente (FIDO) dio entamu esti martes col izáu de la bandera ‘multicolor’ que recueye los símbolos d’Asturies, Galicia, Breizh y Gibraltar. Pa esti miércoles ta prevista la segunda xornada de Culturlingua.
 
Manuel Jesús González, alcalde de Tapia, y Martín F. Cascudo, direutor del Festival, encargáronse d’izar la bandera que simboliza la fusión de cultures que propón el festival y que lleva los símbolos de los países de les formaciones que toman parte nél. Asina, esti emblema que carauteriza’l FIDO va permanencer nel parque de Tapia hasta’l domingu, xornada última del certame.
 
Na so intervención, l’alcalde tuvo pallabres d’agradecimientu pa la Banda de Gaitas Occidente, organizadora del festival. “Son un grupu de persones que consiguieron que’l FIDO forme parte de la nuesa historia cultural y festiva. La Banda de Gaitas Occidente convierte cada añu a Tapia na capital de la cultura celta per una selmana”, afirmó. Amás, González fixo referencia a la frase de Víctor Hugo ‘Lo que mueve al mundu nun son les máquines, sinón les idees bones’ y añadió que’l FIDO “ye una d’eses idees bones y contribúi a dar atractivu cultural al conceyu y a meyorar la imaxe turística de Tapia”.
 
Pa esta segunda xornada del FIDO, amás de les actividaes propies del Mercáu Medieval instaláu nes places de la Constitución y Campogrande, ta prevista la celebración de la segunda parte de Culturlingua, iniciativa que tien como oxetivu difundir la cultura propia del llugar y d'Asturies y que, amás, ufre la posibilidá de mercar llibros, música y materiales en gallego-asturianu y asturianu nun stand instaláu pa la ocasión nel Auditoriu. La banda de música llocal La Filarmónica, creada na década de los 40, va protagonizar una charra-coloquiu con dellos miembros de la citada formación, a les 20 hores, moderada por Josefina Cascudo baxo’l títulu ‘A Filarmónica nel recordo’. Amás, pa completar l’homenaxe, va instalase una esposición pequeña con semeyes y oxetos venceyaos a la banda. Tres la charra-coloquiu, el grupu Airecor va facer una actuación musical nel llugar pa, yá de nueche, a les 23.30 hores nel puertu, dar entamu al ciclu de conciertos nocherniegos del FIDO cola bandina El Koku la Manzana.
 
Otra manera, el Festival Internacional Xixón 5º 40’ tamién va vivir güei la so segunda xornada con teatru y música. Pa les 19 hores, na plaza de la Casa Nava, ta prevista la representación de ‘Pebides’, por Factorum Teatru. Mentes, pela nueche, a les 22 hores na Plaza Mayor, va tener llugar el primer conciertu internacional del Festival cola presencia de los escoceses Lau.