La Banda Gaites Villaviciosa reconoz a Felpeyu y Maojo

Celebra'l Festival de Navidá nel Teatru Riera.

Felpeyu, "ún de los grupos punteros nel panorama folk asturianu y internacional", de celebración pol so 25 aniversariu, va recibir la distinción de la Banda Gaites Villaviciosa-El Gaitero na so estaya de Promoción y Defensa de la Cultura Asturiana, gallardón que yá tienen l'Asociación de Música Tradicional Muyeres, Llan de Cubel, Dixebra o Xosé Antón Fernández 'Ambás'. Mentes, l'artista maliayés Pablo Maojo va llevar el d'Apoyu y Ayuda a la Banda Gaites.

Esta entrega va tener llugar nel marcu del Festival de Navidá que celebra l'agrupación colos alumnos de la Escuela de Música Tradicional. Nél va mostrase'l trabayu de les alumnes y alumnos, con edaes que van dende los 6 a los 60 años, de les distintes especialidaes impartíes, esto ye, gaita, tambor asturianu, pandereta, baille tradicional, acordión diatónicu y flauta travesera de madera.

Una actuación breve de la banda va zarrar esti eventu que va tener como sede'l Teatru Riera dende les 19 hores. Pa completar la xornada, l'agrupación celebra la so cena de Navidá na sidrería La Espicha, con un preciu de 22 euros y plazu p'apuntase hasta güei.