La Banda Gaites Villaviciosa-El Gaitero entama'l FIG más ambiciosu pa celebrar el so 25 aniversariu

Cinco xornaes de música y más de 300 participantes conformen el Festival Internacional de la Gaita (FIG) más ambiciosu qu’entamó hasta la fecha la Banda Gaites Villaviciosa. Nél destaca l'actuación el vienres de Llan de Cubel.
 
La banda gaites maliaya celebra asina’l so vixésimuquintu aniversariu. La undécima edición del FIG va principiar el xueves y va allargase hasta’l llunes, axuntando en Villaviciosa a bandes de gaites del país, El Bierzu y Eslovaquia. Amás, nestes cinco xornaes tán previstes la celebración de trés nueches folk con formaciones bien conocíes pol públicu asturianu. Ente elles destaca la presencia de Llan de Cubel, el vienres, que va dar ún de los trés conciertos que tien programaos pa esti añu, l’únicu n’Asturies.
 
Na llista de bandes participantes figuren la Banda de Gaites Castro Bergidum (El Bierzu), Eprojen Huken (Eslovaquia), la Bandina de la Escuela de Música Tradicional de Villaviciosa, La Reina'l Truébano, Mieres del Camín, Corvera d'Asturies, Villa de Mieres, y la mesma Banda Gaites Villaviciosa-El Gaitero. La formación llocal va ufrir un conciertu “bien especial”, en palabres del so direutor, Martín Poladura, na segunda nueche celta, el vienres 9 a partir de les 21 hores, cola collaboración de los músicos Jorge Ibañez (bouzuki), Pablo Valdés (guitarra acústica), Daniel Bass (baxu llétricu), Juan Bertrán (guitarra llétrica), Oresten Barbachán (batería y percusiones), Rubén Mol (batería), Héctor Braga (violín, voz y zanfona) y Dani Álvarez (flautes). Nesta xornada ye tamién cuando va actuar Llan de Cubel, Fred Morrison y Corquiéu.
 
Mentes, la primer nueche folk va celebrase’l xueves, tamién a partir de les 21 hores, cola presencia de Eprojen Huken, d’Aira da Pedra (El Bierzu), La Tarrancha y Skama la Rede; y el llunes, la tercera, con Duerna y la Bandina la Curuxa. Amás, nes cinco xornaes del FIG van celebrase delles actividaes y un Mercáu Tradicional con mediu centenar de puestos. El sábadu, a les 22.30 hores, ta prevista una gran espicha, con un aforu máximu de 800 persones, pa la que ye necesaria sacar entrada.
 
Declive de les nueches celtes
 
Poladura esplicó que la iniciativa d'entamar un eventu de tal envergadura naz, per un llau, pa celebrar los 25 años de la banda, y per otru ante'l contestu de “declive y pasotismu” xeneral de “nueches monotemátiques qu'había antes de la mal llamada música celta”. “Por eso fiximos esta apuesta”, señala. El direutor de la Banda Gaites Villaviciosa-El Gaitero nun inora que foi complicao llograr patrocinadores pa facer frente a un presupuestu que ronda los 50.000 euros. “La verdá ye que tuvimos suerte, porque siendo un añu d'eleiciones complícase too”, señala. Ente les entidaes collaboradores, destaca la presencia de Sidra El Gaiteru, el Conceyu de Villaviciosa, la Mancomunidá de la Sidra, la Conseyería de Cultura y Deporte, la Fundación José Cardín Fernández, Caxastur y Caxa Rural.
 
Sicasí, el director de la banda insiste na dificultá actual pa entamar esti tipu de celebraciones. De primeres, alude a la falta d'apoyu institucional. Recuerda, a manera d'exemplu, que l'ayuda del Gobiernu autonómicu cubre un 2 por cientu del montante total, polo que “sin l'ayuda de los conceyos sería imposible”. De segundes, percibe una “crisis” no referente a grupos y músicos. “Hai pocos grupos, y que tean en forma, ensayando regularmente, munchos menos”, alvierte.