La Banda Gaites Villa de Xixón celebra esta selmana’l so festival

|

El XII Festival de Bandes de Gaites Villa de Xixón ta celebrándose estos díes na ciudá pese a la retirada d’ayudes municipales y los conflictos internos de la banda. Los gaiteros de la formación apostaron por nun dexar morrer esti certame.
 
Esti contestu obliga a los músicos de la banda, que tienen un enfrentamientu cola direición actual presidida por Rubén Cardín, a la que nun reconocen como tal, a apostar por bandes asturianes pa sacar alantre esta edición del festival. Asina, estos díes, alredor de les 19.30 hores, xixoneses y visitantes podrán ver actuaciones de la Banda Gaites Villa de Xixón en puntos emblemáticos de la ciudá, como la Plaza’l Marqués, el Paséu de Begoña o El Náutico.
 
El platu fuerte del festival va tener llugar el viernes: a les actuaciones de la formación xixonesa nestos mesmos puntos de la villa, y n’otros como la Plaza Italia o la Rula Antigua, van xunise tamién la Banda Gaites Infantil Magüeta, la Banda Gaites Ribeseya, la Banda Gaites Conceyu de Siero, la Banda Gaites Corvera d'Asturies y la Banda Gaites Seronda de Xixón. Por último, toes estes formaciones van celebrar nel Campu Valdés, a les 20.30 hores, la gala de pieslle del festival.
 
Protestes de los músicos
 
La situación de la Banda Gaites Villa de Xixón, con una direutiva non reconocía polos músicos, lleva a esta histórica formación xixonesa a vivir un momentu complicáu. Per un lláu ta la xunta direutiva de Rubén Cardín y, pel otru, el direutor musical de la banda, José Luis García, que tien el sofitu de los integrantes de la mesma, que llegaron inclusive a manifestase la selmana pasada frente al xulgáu de Prendes Pando denunciando’l “secuestru” que vive la banda y el cobru de cheques a los socios ensin xustificar. L’entamu del conflictu vien de l’asamblea celebrada en xineru del 2011, na que taba previsto la eleición d’una xunta direutiva nueva, que foi impugnada por Cardín.
 
A estos problemos internos sumóse nos meses últimos la intención del Conceyu de Xixón d’incorporar el Festival de Bandes de Gaites Villa de Xixón al programa del Festival Arcu Atlánticu, dalgo a lo que s’opunxo García y los sos músicos, qu’esti añu conocieron en febreru que nun diben recibir la subvención municipal cola qu’entamaben el certame tolos branos.
 

Contador Estadistiques